দেশত নিৱনুৱা সমস্যাই ভয়াবহ ৰুপ ধাৰণ কৰাটো সৰ্বজনবিদিত| মুঠ জনসংখ্যাৰ আধাতকৈ বেছি লোকে কৃষি কৰ্মৰ ওপৰত নিৰ্ভৰ কৰি জীৱন নিৰ্বাহ কৰে| একাংশই চৰকাৰী চাকৰিৰ আশা ত্যাগ কৰি কৃষি কৰ্মকে উপাৰ্জনৰ পথ হিচাপে বাছি লৈ নিজৰ ভাগ্য নিজে ৰচনা কৰে| এই সকল লোকে নিজৰ কষ্ট আৰু ত্যাগৰ বলত সফলতাৰ শীৰ্ষত আৰোহণ কৰিবলৈ সক্ষম হয়| গোৱালপাৰা জিলাৰ ৰংজুলি ৰাজহ চক্ৰৰ অন্তৰ্গত টিপলাইৰ সমীপৰ বৰপথাৰ গাঁৱৰ এনে এজন সফল কৃষক মো: জাকিৰ হুচেইন|
আৰ্থিক দুৰাৱস্থাৰ বাবে শিক্ষা জীৱন আধাতে সামৰি ঘৰৰ মাটিডৰাতে প্ৰথমতে ৰোপণ কৰে কঁঠাল, আম, নাৰিকল, তামোল, মাটিকঁঠাল আৰু অমিতাৰ খেতি| প্ৰায় ৫ বিঘা মাটি সামৰি আৰম্ভ কৰা এই ফল গছবোৰে পৰৱৰ্তী সময়ত ফল লাগিব ধৰাত ফল বিক্ৰী কৰি ২০-২৫ হাজাৰ টকা বছৰেকত উপাৰ্জন হোৱা বুলি জনায়| ইয়াৰ উপৰি যোৱা দুই বছৰ মানৰ পৰা নিজৰ ২ বিঘা মাটিত ভোল, জিকা, কোমোৰা, লেচেৰা খেতি আৰম্ভ কৰি এইবেলি তেওঁ ভোল কিলো প্ৰতি ২০-২৫ টকা, জিকা ২০-২৫ টকা, কোমোৰা ১৫-২০ টকা, লেচেৰা কিলো ২০-২৫ টকা দামত টিপলাই সাপ্তাহিক বজাৰ, শিমলীতোলা সাপ্তাহিক বজাৰত বিক্ৰী কৰে| প্ৰতি সপ্তাহত ২০০ ৰ পৰা ২৫০ কিলোগ্ৰামকৈ পাচলি বজাৰত বিক্ৰী কৰি নিজৰ সংসাৰখন সুচাৰুৰুপে চলোৱাৰ উপৰি উপৰুৱা টকা সঞ্চয় কৰা বুলি জনায়| আগলৈ তেওঁ খেতি মাটিৰ পৰিমাণ বৃদ্ধি কৰি জলকীয়া, বেঙেনা, আদা, কচু আদি খেতি কৰাৰ লগতে পুখুৰী এটা খান্দি মৎস্য পালন কৰাৰ ইচ্ছা প্ৰকাশ কৰে| খেতিৰ লগতে তেওঁ ঘৰত হাঁহ, কুকুৰা, ছাগলীৰ উপৰি গাই গৰু পালন কৰি বছৰেকত ২০-২৫ হাজাৰ টকা উপাৰ্জন কৰে| তেওঁ বৰ্তমানৰ শিক্ষিত যুৱচামক কৃষি কৰ্মত নিয়োজিত কৰি উপাৰ্জনমুখী হ’বলৈ আহ্বান জনায়|
লেখক:- জ্যোতিষ নাথ,টিপলাই,গোৱালপাৰা
দূৰভাষ:৮৪৮৬৮৬০৪৮১
শেহতীয়া উন্নীতকৰণ: : 3/10/2020