অমিতা খেতিৰ সমস্যা আৰু ইয়াৰ সমাধান

অমিতা খেতিত বিভিন্নধৰণৰ সমস্যাৰ সন্মুখীন হোৱা দেখা যায় । সময়মতে এই সমস্যাবোৰৰ বিহিত ব্যৱস্থা নল’লে উৎপাদন হ্ৰাস পায় আৰু গছবোৰ অকালতে মৰি যায় । অমিতা গছত পোকৰ উপদ্ৰৱ প্ৰায় নাই বুলিয়ে ক’ব পাৰি ।

অমিতা ফলৰ সমস্যা :- কেতিয়াবা অমিতাৰ বহিৰ্ভাগ ওখোৰা-মোখোৰা হোৱা দেখিবলৈ পোৱা যায়, কিন্তু প্ৰকৃততে ফলবিলাক মিহি হ’ব লাগে । বিশেষকৈ পৈণত হোৱা অমিতাত এই সমস্যাটো বেছিকৈ হয় । গছত প্ৰয়োজনীয় ‘বৰণ’ নামৰ মৌলবিধৰ অভাৱ হ’লে এই সমস্যাৰ সন্মুখীন হয় আৰু বজাৰত এনে ফলৰ চাহিদা কমি যায় । সেয়েহে সাৰ প্ৰয়োগ কৰোঁতে লগতে ৫৯ গ্ৰাম বৰাক্স প্ৰতিজোপা গছত দিব লাগে । তেতিয়া এই সমস্যাৰ পৰা সকাহ পাব পাৰি ।

গুৰি পচা বেমাৰ :- এই বেমাৰবিধ হৈছে ভেকুৰজনিত । সেয়েহে ই গছৰ গুৰিভাগ পচাই দিয়ে আৰু পাতবিলাক হালধীয়া পৰি মৰি যায় । এই বেমাৰৰ  পৰা ৰক্ষা পাবলৈ হ’লে গছৰ গুৰি অংশত এক শতাংশ শক্তিৰ বৰডো মিশ্ৰণ প্ৰয়োগ কৰিব লাগে । ইয়াৰ উপৰি ব্লাইটেক্স বা ফাইটলিন ২ গ্ৰাম ১ লিটাৰ পানীত মিহলাই গছৰ গুৰি অংশ তিতি যোৱাকৈ প্ৰয়োগ কৰিলে এই সমস্যা সমাধান হয় । বাৰিষা কাল আৰম্ভ হোৱাৰ পূৰ্বে মাৰ্চ মাহত এই ঔষধ প্ৰয়োগ কৰিব লাগে ।

শিপা পচা বেমাৰ :- গছৰ শিপাবিলাক পচি যোৱা এই বেমাৰবিধ ভেঁকুৰৰ পৰাই আক্ৰান্ত হয়। গছৰ শিপা পচি যোৱাৰ লগে লগে গছৰ পাতবিলাক হালধীয়া হ’বলৈ ধৰে আৰু গছজোপা দুৰ্বল হৈ হাউলি পৰে । এই বেমাৰৰ ৰক্ষা পাবলৈ গুটি বা বীজবিলাক ৰোৱাৰ আগতে ‘কেপটান’ নামৰ দৰৱেৰে শোধিত কৰিব লাগে । বেমাৰযুক্ত গছত এক শতাংশ শক্তিৰ বৰডো মিশ্ৰণ প্ৰয়োগ কৰিব লাগে । নতুবা গুটি বা বীজ সিঁচাৰ আগতে বীজতলী বা পুলিবাৰী নাইবা পলিথিন মোনাৰ মাটি অংশ ৪ শতাংশ শক্তিৰ ‘ফৰমেলিন’ নামৰ দৰৱেৰে তিয়াই লৈ মাটিখিনি বীজাণুমুক্ত কৰিব লাগে ।

পাত মুজুৰা পৰা আৰু মোজেইক বেমাৰ ;- এই বেমাৰ দুবিধ ভাইৰাছৰ দ্বাৰা আক্ৰান্ত হয় । দুয়োটা বেমাৰত প্ৰধানকৈ দুবিধ মোৱা পোকে বেমাৰবিধ বিস্তাৰিত কৰে । পাত মুজুৰাখোৱা বেমাৰত এবিধ পতংগই কুমলীয়া পাতৰ ৰস শুহি খোৱাৰ ফলত পাতবোৰ সৰু হৈ ঘোৰ খোৱা দেখা যায় । মোজেইক বেমাৰতো এবিধ পতংগই পাতৰ ৰস শুহি খায় আৰু ইয়াৰ ফলত পাত হালধীয়া হয়, আকৰত সৰু হৈ ঠাৰিবিলাক হাউলি যায় । নতুন কুমলীয়া পাত নোলোৱা হয় আৰু গছৰ বৃদ্ধি নোহোৱা হয় । ভাইৰাছৰ পৰা আক্ৰান্ত হ’লে গছবোৰ উঘালি পুৰিব লাগে বা পুতি পেলাব লাগে যাতে বাকী স্বাস্থ্যৱান গছবিলাক আক্ৰান্ত নহয় ।

শস্য কৃমিৰ সমস্যা:- অমিতাৰ শিপাত কেতিয়াবা শস্য কৃমিয়ে আক্ৰমণ কৰে । ফলত পাতবিলাক হালধীয়া পৰে, গছৰ বৃদ্ধি কমে আৰু উৎপাদনো হ্ৰাস হয় । এই সমস্যা নিবাৰণ কৰিবলৈ হ’লে গছৰ গুৰিত ২০-২৫ গ্ৰামকৈ প্ৰতিজোপাতে ‘ফুৰাডন’ নাম ঔষধবিধ প্ৰয়োগ কৰিব লাগে । অমিতা গছ ৰোৱাৰ ১০-১২ মাহৰ পৰাই ফল চপাব পৰা হৈ যায় । এবাৰ ফল লগা আৰম্ভ হ’লে একেৰাহে বহুদিনলৈ ফল দি থাকে । ফলৰ সংখ্যা বেছি হ’লে মাজে মাজে সৰু ফল কিছুমান ছিঙি দিব লাগে , তেতিয়া ফলবোৰৰ বৃদ্ধি ভাল হয় আৰু আকাৰত ডাঙৰ হয় । অমিতা গছৰ জাতৰ ভিন্নতাৰ ওপৰত ভিত্তি কৰি ফল ধাৰণ কৰা ক্ষমতা বেলেগ বেলেগ হয় । হাইব্ৰীড জাত যেনে স্বপ্না, আৰ্কা, সূৰ্য্য আদি সকলো অমিতা গছতে ফল ধৰে । গততিকে হাইব্ৰীড জাতবিলাকৰ বীজ আজিকালি বজাৰত বেছিকৈ পোৱা যায় ।

লেখক – ড° ধাৰীন্দ্ৰ নাথ হাজৰিকা, দৰদী প্ৰিয়ম দুৱৰা

উৎস – দৈনিক জনমভূমি