মূল পৃষ্ঠা / শিক্ষা / শিকাৰ আনন্দ / বিদেশী ভাষা এটা কেনেকৈ সহজে শিকিব পাৰি?
অংশিদাৰী
Views
  • স্থিতি: সম্পাদনাৰ বাবে মুকলি

বিদেশী ভাষা এটা কেনেকৈ সহজে শিকিব পাৰি?

বিদেশী ভাষা এটা কেনেকৈ সহজে শিকিব পাৰি লিখা হৈছে

 

তথ্য –প্ৰযুক্তিৰ যুগত এখন গাঁৱৰ লেখিয়া হৈ পৰা আজিৰ বিশ্বত একাধিক ভাষাৰ জ্ঞান বহু সময়ত প্ৰয়োজনীয়।আমাৰ দেশতে উচ্চ শিক্ষাৰ মাধ্যম সাধাৰণতে বিদেশী ভাষা ইংৰাজীয়েই।বিদেশী ভাষা এটা নিৰ্ভুলভাৱে আয়ত্ত কৰাৰ বাবে যথেষ্ট পৰিশ্ৰম আৰু অধ্যৱসায়ৰ প্ৰয়োজন হয়।দেখা যায় আমাৰ বহু ছাত্ৰ-ছাত্ৰীয়ে ইংৰাজী ভাষাটোৰ প্ৰতি এক অহেতুক ভয় পুহি ৰাখে আৰু ভালকৈ ইংৰাজী ভাষাটো লিখিব পৰা বহু ছাত্ৰ-ছাত্ৰীয়েও ইংৰাজীত কথা-বতৰা পাতিবলৈ,সৰু বক্তৃতা এটা দিবলৈও অসুবিধা পায়।সাধাৰণতে পাঁচ হাজাৰমান প্ৰচলিত শব্দ জানিলেই ভাষা এটা কথা পাতিবলৈ আৰম্ভ কৰিব পাৰি।

আজিকালি বিভিন্ন ভাষা শিকিবৰ বাবে অনেক কিতাপ,অনলাইন উৎস,ক’ৰ্ছ আদি উপলব্ধ।কিন্তু বহু সময়ত এই উৎসসমুহ ব্যৱহাৰ কৰি যথেষ্ট টকা-পইচা খৰচ কৰাৰ পিছতো ভাষা এটা শিকিবলৈ বহু ছাত্ৰ-ছাত্ৰী সক্ষম নহয়।ভাষা এটা ভালকৈ ক’বলৈ তথা লিখিবলৈ শিকাৰ বাবে কিছুমান কথা মনত ৰাখিব লাগে।এই ধৰণৰ কথা কেইটামান তলত আলোচনা কৰা হ’ল-

১।মাতৃভাষাৰ জ্ঞান:আজিকালি বহুতো পিতৃ-মাতৃয়ে নিজৰ সন্তান ইংৰাজী ভাষাটোত সলসলীয়া হওক বুলি ল’ৰা-ছোৱালীক সৰুৰে পৰাই ইংৰাজী শিকায় আৰু অসমীয়া ভাষাটো ক’বলৈ,পঢ়িবলৈ ,লিখিবলৈ নিশিকায়।কিন্তু ঘৰত যিয়েই নকৰক,বাহিৰলৈ ওলালেই সেইসকল ল’ৰা-ছোৱালীয়ে কথিত ভাষাটোত ক’বলৈ,ভাষাটো বুজিবলৈ বাধ্য হয়।ইয়াৰ ফলত তেওঁলোক সমস্যাত পৰে আৰু ক’ব নোৱাৰাকৈয়ে এক মানসিক হেঁচাত পৰে।আধা কথা ইংৰাজীত আৰু আধা কথা কথিত ভাষাটোত শিকাৰ ফলত শেষত তেওঁলোকে নিজৰ ভাষাটোত শিকাৰ ফলত শেষত তেওঁলোকে নিজৰ ভাষাটোও ভালকৈ ক’ব পঢ়িব,লিখিব নোৱাৰে আৰু ইংৰাজী ভাষাটোতো দুৰ্বল হয়।

শিশুসকলৰ মগজু সাধাৰণতে যথেষ্ট চোকা হয় আৰু কম বয়সত তেওঁলোকক একাধিক ভাষা শিকালে কোনো সমস্যা নহয়।কিন্তু তাৰ বাবে তেওঁলোকক নিজৰ মাতৃভাষাৰ লগতে প্ৰত্যেকটো বিদেশী ভাষাই সম্পুৰ্ণকৈ শিকাব লাগে।

২।শব্দৰ মুল উৎসৰ জ্ঞান:ভাষা এটাৰ যিমান পাৰি অধিক শব্দ জানিলে ভাষাটো নিৰ্ভুলভাৱে বুজিবলৈ ,ক’বলৈ সহজ হয়।অধিক ভাষা  শিকাৰ এটা সুন্দৰ উপায় হ’ল শব্দবিলাকৰ মুল উৎসৰ বিষয়ে জনা।প্ৰতিটো ভাষাতে এটা মুল শব্দৰ পৰা অনেক বেলেগ বেলেগ শব্দৰ উৎপত্তি হয়।গতিকে মুল শব্দটো জানিলে তাৰ পৰা উদ্ভৱ হোৱা আন শব্দবিলাকৰ অৰ্থ বুজাত,মনত ৰখাত আৰু অনুমান কৰাতো সুবিধা হয়।ইংৰাজী ভাষাটোৰ শব্দৰ উৎসৰ বিষয়ে জানিবলৈ এখন অতি উপযুক্ত কিতাপ হ’ল Norman Lewis ৰ ‘word Power Made Easy’ নামৰ কিতাপখন।

৩।নিৰ্দিষ্ট প্ৰসংগত শিকাৰ প্ৰয়োজনীয়তা:ভাষা এটাৰ শব্দবিলাক সেইবিলাক ব্যৱহাৰৰ প্ৰসংগসহ জনাটো দৰকাৰ।উদাহৰণস্বৰুপে ইংৰাজী ভাষাটোত বিশেষ্য,বিশেষণ,ক্ৰিয়া আদি শব্দবিলাক সকলো লিংগতে একেই থাকিলেও জাৰ্মান ভাষাত কৰ্তাৰ লিংগ ভেদে এই শব্দবিলাকৰ গঠন সলনি হয়।আনহাতে,প্ৰতিটো ভাষাতে একেটা অৰ্থই বুজাবলৈ বেলেগ বেলেগ প্ৰসংগত বেলেগ বেলেগ শব্দৰ ব্যৱহাৰ হয়,কাজেই ভাষা এটা শিকোঁতে এই কথাবিলাকো আঁতি-গুৰি মাৰি শিকাৰ দৰকাৰ।

৪।শব্দ হিচাপে নহয়,শব্দৰ গোট হিচাপে শিকাৰ প্ৰয়োজনীয়তা:বিদেশী ভাষা এটা বিশেষকৈ কোৱাৰ বাবে এই কথাটো গুৰুত্বপুৰ্ণ।।দেখা যায় কথা কওঁতে আমি কিছুমান শব্দ বেলেগ বেলেগকৈ নকৈ একোটা শব্দৰ গোট বা খণ্ড বাক্য হিচাপে কওঁ।বিদেশী ভাষা এটা ক’বলৈ শিকোঁতেও আমি বাক্যবিলাক যিমান পৰা যায় খণ্ড বাক্য হিচাপেই মনত ৰখা প্ৰয়োজন।

৫।কথোপকথন:ভাষা এটা ক’বলৈ শিকাৰ আটাইতকৈ গুৰুত্বপুৰ্ণ প্ৰয়োজনটো হ’ল কথোপথন।সীমিত ভাষা জ্ঞানেৰে হ’লেও ,ব্যাকৰণ ভুলকৈ হ’লেও সাহস কৰি কথোপকথনৰ অভ্যাস নকৰালৈকে ভাষা এটা ক’বলৈ শিকিব নোৱাৰি।ইয়াৰ বাবে কেইবাজনো লোক একগোট হৈ দৈনিক কিছু কিছু সময় শিকিবলগীয়া ভাষাটোত কথোপকথন কৰিলে ভাষাটোত সাৱলীলতা আহে।আচল কথা হ’ল বিদেশী ভাষা এটা কোৱাৰ প্ৰথমাৱস্থাত আমি নিজৰ মাতৃভাষাত ভাবোঁ আৰু তাক অনুবাদ কৰি বিদেশী ভাষাটোত তাক মুখেৰে প্ৰকাশ কৰোঁ।এই গোটেই কামখিনিত মগজুক কিছু সময় লাগে,ফলত ভাষাটো কওঁতে সাৱলীলতা নাহে।কিন্তু কথোপকথনৰ অভ্যাসৰ ফলত লাহে লাহে আমাৰ মগজুৱে ক’বলগীয়া কথাবিলাক সেই ভাষাটোত ভাবিবলৈ শিকে আৰু ফলত সাৱলীলতা আপোনা-আপুনি আহে।

ভাষা শিকাৰ বাবে লগৰীয়া নাপালে নিজেই একো একোটা সৰু-ডাঙৰ বিষয়ৰ ওপৰত ডাঙৰ ডাঙৰকৈ বক্তৃতা দি শুনিব লাগে,এইদৰেও কিছু পৰিমাণে সাৱলীলতা আহিব।

৬।শ্ৰৱণ:ভাষা এটা ক’বলৈ শিকাৰ বাবে ভাষাটোত ,পাৰিলে সেই ভাষাটোক মাতৃভাষা হিচাপে কোৱা লোকৰ মাজত হোৱা কথোপকথন শুনিব লাগে।ইয়াৰ ফলত কথাবিলাক মগজুৱে বুজিবলৈ চেষ্টা কৰোঁতেও ভাষাটোৰ ক্ষেত্ৰত মগজু যথেষ্ট চোকা হৈ পৰে।

ভাষা এটা ক’বলৈ শিকাৰ অন্য এটা ভাল উপায় হ’ল নিজকে ভাষাটো শিকিবলৈ বাধ্য কৰা।সকলোৰে বাবে সম্ভৱ নহ’লেও যদি শিকিবলগীয়া ভাষাটোৰ বাহিৰে আন ভাষাত সমাজৰ লগত যোগাযোগ কৰিব নোৱাৰা অৱস্থাত নিজেই পৰিব পৰা যায়,তেন্তে ভাষাটো ক’বলৈ ,বুজিবলৈ শিকাৰ বাহিৰে গত্যন্তৰ নাথাকে।এই ধৰণৰ কথাবিলাক মন কৰিলে বিদেশী ভাষা বুলিলেই পেটত হাত-ভৰি লুকুৱাবলগীয়া অৱস্থাৰ পৰা হাত সাৰি থাকিব পাৰি।

প্ৰস্ংগত:এইখিনিতে এটা গুৰুত্বপুৰ্ণ কথা কওঁ।ভাষাৰ জ্ঞান আৰু সামগ্ৰিক বুদ্ধিমত্তা একে বস্তু নহয়।আমাৰ সমাজত সততে ইংৰাজী ক’ব,লিখিব আৰু পঢ়িব জনাসকলক বিদ্বান বুলি ধাৰণা কৰা হয়,কিন্তু এয়া সঁচা নহয়।ইংৰাজীত সাৱলীল নোহোৱাকৈও জাপান,জাৰ্মানী,ফ্ৰান্স,স্পেইন আদিৰ দৰে দেশ আজি উন্নত দেশ।হ’লেও ইংৰাজী ভাষা জ্ঞানে আমাক নিজৰ ভাষাত অৰ্জন কৰিব নোৱাৰা বহু নতুন নতুন জ্ঞান অৰ্জন কৰিবলৈ সুবিধা দিয়ে।একে সময়তে ইংৰাজী ক’ব পাৰিলে বিশ্বত চলি যায় বুলি ভবাটোও শুদ্ধ নহয়।ইউৰোপ,লেটিন আমেৰিকা আদিৰ দৰে বহু দেশত ইংৰাজীৰে চলাত অসুবিধা আছে।গতিকেই জাৰ্মান,স্পেনিছ,পৰ্তুগীজ,ফৰাচী,ইটালিয়ান,গ্ৰীক আদি ভাষাবিলাক পাৰিলে শিকি ৰাখিলে বহু ক্ষেত্ৰত সুবিধাও হয়।

লেখক: ড: বসন্ত কুমাৰ বৰা (শিক্ষা বাৰ্তা)

3.30303030303
তৰাসমূহৰ ওপৰত ক্লীক কৰি মান প্ৰদান কৰক।
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top