মূল পৃষ্ঠা / স্বাস্থ্য / আয়ুস / দৈনন্দিত জীৱনত যোগাসনৰ উপকাৰিতা
অংশিদাৰী
Views
  • স্থিতি: সম্পাদনাৰ বাবে মুকলি

দৈনন্দিত জীৱনত যোগাসনৰ উপকাৰিতা

দৈনন্দিত জীৱনত যোগাসনৰ উপকাৰিতাৰ বিষয়ে লিখা হৈছে ।

অতি পুৰণি কালৰ পৰাই স্বাস্থ্য ৰক্ষাৰ এক প্ৰাকৃতিক পদ্ধতি হিচাপে যোগাসনে বিশেষ গুৰুত্ব পাই আহিছে । যোগাভ্যাস আমি সৰুৰে পৰাই শিকা উচিত । যোগাসনে সদায় মনটোক শুদ্ধ পথৰ সন্ধধ্ন দিয়ে । দৈনন্দিন জীৱনত যোগাভ্যাসে শৰীৰত সৃষ্টি হোৱা ৰোগ প্ৰতিৰোধ কৰিব পাৰে আৰু নীৰোগী হৈ আপুনি এটি সুন্দৰ জীৱন যাপন কৰিব পাৰে । দৈনন্দিন কৰা যোগাভ্যাসৰ ফলত প্ৰত্যেক দিনে আপুনি শৰীৰত সুখী অনুভৱ কৰিব পাৰিব । আপোনাৰ চঞ্চল মনক দমন কৰিব পৰা এক প্ৰভূত্ব লাভৰ উপায় পাব । মনত সৃজনী শক্তিৰ ক্ষমতা শক্তি বৃদ্ধি পাব । আজিৰ দিনত সকলো মানুহে নিজৰ স্বাস্থ্যক লৈ সচেতন । সেয়া যোগাভ্যাসেই হওক বা আন ব্যায়ামেই হওক । আজি এটা প্ৰয়োজনীয় আসনৰ বিষয়ে জানো আহক- ‘বজ্ৰাসন’ ।

এই যোগাসনৰ ফলত শৰীৰটো বজ্ৰৰ দৰে কঠিন আৰু শক্তিশালী কৰি তুলিব পাৰি । এই আসন কৰাৰ পিচত আমাৰ শৰীৰটোত ধ্যান, বিশ্ৰাম স্বাস্থ্যৰ অপূৰ্ব সমাহাৰ ঘটিব । খোৱা-বোৱাৰ পিচতো এই ব্যায়াম কৰিব পাৰিব । পুৱা-গধূলি যিকোনো সময়তে এই বজ্ৰাসনত বহিব পাৰিব । অন্যান্য যোগাসন কৰিবলৈ কিছুমান নিয়ম-কানুনৰ যোগেদি যাব পাৰিব । প্ৰাণায়াম, ধ্যান আদি পুৱাৰ সময়খিনিত কৰিব পাৰিলে ভাল ফল পোৱা যায় । সূৰ্য উদয় হোৱাৰ আগতে গা-পা ধুই শুদ্ধ মনেৰে যোগাভ্যাস কৰিব লাগে । খোৱা-বোৱা কৰাৰ চাৰি ঘণ্টামানৰ পিচতহে আসনত বহিব লাগে । প্ৰথমতে আপুনি বজ্ৰাসনত বহি লওক । বাওঁ ভৰিৰ আঁঠুটো ভাঁজ কৰি নিতম্ব গোৰোহাটোত ৰাখি একে ধৰণেৰে সোঁ ভৰিও ভাঁজ কৰি লওক । লক্ষ্য ৰাখিব যাতে ভৰিৰ পতা দুখন মাটিত ভালদৰে লাগি থাকে । গোৰোহা দুটা নিতম্বৰ বাহিৰৰ ফালে সামান্য ওলাই থাকে । এতিয়া আপুনি মেৰুদণ্ডসহ কঁকাল পোন কৰি লগতে বুকু, ডিঙি পোন কৰি লওক । হাত দুখন আঁঠু দুটাৰ ওপৰত ৰাখক । এই সময়ত আপুনি লক্ষ্য ৰাখিব আপোনাৰ মনৰ আজ্ঞা-চক্ৰ কপালৰ মাজৰ ঠাইত স্থিৰ কৰি ৰাখিবলৈ চেষ্টা কৰক । এয়ে হ’ল- ‘পূৰ্ণ বজ্ৰাসন পদ্ধতি’।

বজ্ৰাসনে শৰীৰত কেনেকৈ কাম কৰে -

বজ্ৰাসনত বহাৰ লগে লগে আমাৰ নিম্ন অংশত প্ৰচুৰ চাপ পৰে । চাইট্ৰিক নাৰ্ভ আৰু স্নায়ুৰজ্জু সক্ৰিয় হৈ উঠে । বজ্ৰাসনে শৰীৰৰ প্ৰতিটো চক্ৰ, যেনে মূলাধাৰ চক্ৰ, স্বাধিষ্ঠান চক্ৰ ইত্যাদি চক্ৰ আৰু সহসা চক্ৰৰ ওপৰত প্ৰভাৱ পেলায় । এই চক্ৰৰ অন্তৰ্গত যকৃৎ পাকস্থলীৰ সংকোচন আৰু প্ৰসাৰণৰ ক্ৰিয়া নিয়ন্ত্ৰণ কৰে, ফলত ৰক্ত সঞ্চালন প্ৰক্ৰিয়া সঠিকভাৱে হয় আৰু বিশুদ্ধ অক্সিজেন প্ৰবাহিত হয় । ফলত তেজৰ দূষিত পদাৰ্থবোৰ পৰিষ্কাৰ হয় ।

কি কি উপকাৰ পাব -

আমি দৈনিক আহাৰ গ্ৰহণ কৰাৰ পিচত নিম্নতম পাঁচ মিনিট, দহ মিনিট বজ্ৰাসনত বহিলে পাকস্থলীৰ খাদ্য মিহলি হৈ পাচন প্ৰক্ৰিয়া ঠিক মতে ঘটে । শৰীৰত হজম শক্তি বৃদ্ধি পায় । এই আসন নিয়মিত কৰিব পাৰিলে কঁকালৰ পৰা ভৰিৰ গোৰোহালৈকে থকা চাইট্ৰিক নাৰ্ভৰ সমস্যাবোৰ দূৰ হ’ব । পিঠিৰ যদি বিষ থাকে ভাল হ’ব । ফলত ভৰি শিৰামূৰি ধৰা, ভৰি টনা, ভৰি জিনজিনোৱা ইত্যাদি স্নায়ুজনিত ৰোগবোৰ দূৰ হ’ব । এই আসন দহ মিনিটৰ পৰা ত্ৰিশ মিনিটপৰ্যন্ত বৃদ্ধি কৰিব পাৰিলে, অপোনাৰ শৰীৰত শাৰীৰিক আৰু মানসিক স্থিৰতা বৃদ্ধি পাব । মূৰৰ বিষ থকাসকলে বজ্ৰাসনত বহি মূৰত তেল দিব । ম’হৰ শিঙৰ ফণিৰে চুলি আঁচুৰিলে চুলি মজবুত হ’ব । চুলি সোনকালে নপকে । অত্যন্ত ব্যস্ত লোকসকলে বিছনাতে বহি এই আসন কৰিব পাৰিব । বজ্ৰাসনৰ বাহিৰে অন্য যোগাসন বিছনাত বহি বা টি ভি চাই কৰিলে সুফল পোৱা নাযায় । পুৱা ৫ বজাত শুই উঠি সূৰ্য উদয় হোৱাৰ আগতে যোগাসনত বহিব পাৰিলে কৃতকাৰ্য হ’বই । ইয়াৰ বাবে নিজৰ মনটো স্থিৰ কৰি ল’ব লাগিব । শৰীৰটো আপোনাৰ এক মন্দিৰৰ দৰে অনুভৱ কৰিব লাগিব । যেনেকৈ ভগৱানৰ মন্দিৰটো পূজাৰীয়ে চাফ-চিকুণ কৰি ধ্যান,  প্ৰাৰ্থনা কৰে ঠিক তেনেকৈ আপোনাৰ শৰীৰটোও শুদ্ধ মনে ধ্যানত বহিব লাগে । তেহে সুফল পাব । দৈনন্দিন যোগভ্যাসৰ ফলত আপোনাৰ উশাহ-নিশাহ লোৱাত কষ্ট পোৱা, কফ, এজমা আৰু শৌচ কঠিন হোৱা সমস্যাবোৰ দূৰ কৰে । দৈনিক যোগাসনৰ ফলত অৰ্থাৎ বজ্ৰাসনে বৃক্ক, মূত্ৰনলী, মূত্ৰাশয় শক্তিশালী কৰি তুলিব । ফলত প্ৰস্ৰাৱজনিত ৰোগবোৰ দূৰ হ’ব । বজ্ৰাসনত বহু লোকৰ হজম আৰু পাচন বৃদ্ধি কৰি তেজৰ আৰু শৰ্কৰাৰ পৰিমাণ কমাই দিয়ে । ফলত ডায়েবেটিছ ৰোগ নিয়ন্ত্ৰণ হোৱাত সহায় কৰে ।

লেখিকা :- দিব্যৰেখা গোস্বামী

উৎস :- দেওবৰীয়া সম্ভাৰ

 

 

1.5
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top